नारायणगाव विघ्नहर टाइम्स वृत्तसेवा
सावरगाव (ता. जुन्नर) येथे दुपारच्या वेळी एका वयोवृद्ध महिलेच्या घरात घुसून मारहाण करत सोन्याचे मंगळसूत्र हिसकावणाऱ्या चोरट्याला स्थानिक गुन्हे शाखेच्या पथकाने सिताफिने बेड्या ठोकल्याची माहिती पोलीस निरीक्षक प्रमोद क्षीरसागर व किरण अवचर यांनी दिली.
जुन्नर पोलीस स्टेशन हद्दीत दि. २२ एप्रिल २०२६ रोजी ही घटना घडली. फिर्यादी कल्पना बाजीराव राजगुरू (वय ६२, रा. सावरगाव, ता. जुन्नर, जि. पुणे) या दुपारच्या वेळी घरी एकट्या असताना एका अज्ञात इसमाने त्यांच्या घरात घुसून त्यांच्यावर हल्ला केला. आरोपीने त्यांच्या गळ्यातील सोन्याचे मंगळसूत्र हिसकावून नेले. तसेच त्यांना जबर मारहाण करून तोंडात दगड कोंबून चार दात पाडल्याची धक्कादायक घटना घडली होती.
या प्रकरणी जुन्नर पोलीस ठाण्यात गुन्हा रजिस्टर क्रमांक ११०/२०२६ अन्वये भारतीय न्याय संहिता २०२३ च्या कलम ३०९(६) प्रमाणे गुन्हा दाखल करण्यात आला होता. घटनेचे गांभीर्य लक्षात घेऊन पुणे ग्रामीण पोलीस अधीक्षक संदीप सिंह गिल्ल यांनी आरोपीला तात्काळ अटक करण्याच्या सूचना दिल्या होत्या.
स्थानिक गुन्हे शाखेने समांतर तपास करत घटनास्थळ परिसरातील सीसीटीव्ही फुटेज तपासले. त्यामध्ये एक संशयित इसम मोटारसायकलवरून जाताना दिसून आला. पुढे नारायणगावच्या दिशेने गेल्यानंतर आरोपीने पोलिसांना चकवा देण्यासाठी कपडे बदलले व वारंवार मार्ग बदलला. तरीही गुन्हे शाखेच्या पथकाने त्याचा मागोवा घेत भोसरीपर्यंत सीसीटीव्ही फुटेज गोळा केले.
गोपनीय माहितीच्या आधारे संशयिताची ओळख रवींद्र गणपत राजगुरू (वय ५४, सध्या रा. अक्षय नगर, भोसरी, पिंपरी-चिंचवड; मूळ रा. सावरगाव, ता. जुन्नर) अशी पटली. दि. २८ एप्रिल रोजी तो घोडेगाव फाटा येथे येणार असल्याची माहिती मिळाल्यानंतर पोलिसांनी सापळा रचून त्याला ताब्यात घेतले.
चौकशीत आरोपीने गुन्ह्याची कबुली दिली असून, फिर्यादी महिला वयस्कर व घरी एकट्या असल्याचे लक्षात घेऊनच त्याने हा गुन्हा केल्याचे सांगितले. त्याच्या ताब्यातून चोरीस गेलेले सोन्याचे मंगळसूत्र जप्त करण्यात आले आहे. आरोपीची वैद्यकीय तपासणी करून पुढील कारवाईसाठी त्याला जुन्नर पोलीस ठाण्यात वर्ग करण्यात आले असून पुढील तपास रघुनाथ शिंदे करत आहेत.
ही कारवाई पुणे ग्रामीण पोलीस अधीक्षक संदीप सिंह गिल्ल, अप्पर पोलीस अधीक्षक रमेश चोपडे, उपविभागीय पोलिस अधिकारी धनंजय पाटील यांच्या मार्गदर्शनाखाली स्थानिक गुन्हे शाखेचे पोलीस निरीक्षक प्रमोद क्षीरसागर, पोलीस निरीक्षक किरण अवचर, सहाय्यक पोलीस निरीक्षक महादेव शेलार, सहाय्यक फौजदार दीपक साबळे, पोलीस हवालदार राजू मोमीन, संदीप वारे, अक्षय नवले व पोलीस शिपाई अभिमन्यू मोटे यांच्या पथकाने केली.
