गणेशोत्सव व ईद-ए-मिलाद हे दोन्ही सण समान कालावधीमध्ये येत असल्याने ईद-ए-मिलाद निमित्त काढण्यात येणारी मिरवणुक मुस्लिम बांधवानी दोन दिवस पुढे ढकली.

नारायणगाव : (प्रतिनिधी) गणेशोत्सव व ईद-ए-मिलाद हे दोन्ही सण समान कालावधीमध्ये येत असल्याने ईद-ए-मिलाद निमित्त काढण्यात येणारी मिरवणुक दोन दिवस पुढे ढकलण्याचा निर्णय नारायणगाव, वारुळवाडी,आर्वी,पिंपळगाव तर्फे नारायणगाव, येडगाव,वडगाव कांदळी, निमगावसावा भागातील मुस्लिम समाजाने घेतला आहे. झालेल्या निर्णयानुसार ईद-ए-मिलाद निमित्त 5 सप्टेंबर 2025 रोजी काढण्यात येणारी नियोजित मिरवणूक 7 सप्टेंबर 2025 रोजी काढण्यात येणार आहे.अशी माहिती नारायणगाव पोलीस ठाण्याचे सहाय्यक पोलिस निरीक्षक महादेव शेलार यांनी दिले. गणेशोत्सव 27 ऑगस्ट ते 6 सप्टेंबर 2025 या कालावधीत संपन्न होत आहे. सहा सप्टेंबर रोजी गणेश मूर्तीचे विसर्जन करून गणेश उत्सवाची सांगता होणार आहे. 5 सप्टेंबर 2025 रोजी ईद-ए-मिलाद सण आहे.मात्र याच कालावधीत गणेशोत्सव साजरा होत असून 6 सप्टेंबर 2025 गणेशोत्सवाची विसर्जन मिरवणूक असणार आहे. यामुळे पोलिसांवर बंदोबस्ताचा मोठा ताण असणार असल्याने नारायणगाव पोलिस ठाण्यात मुस्लिम समाजाच्या बैठकीचे आयोजन करण्यात आले होते.या वेळी नारायणगाव मुस्लिम जमातचे अध्यक्ष ऐजाज आतार,दादाभीयाँ पटेल,हाजी सिद्‌दीक शेख, हाजी कुरेशी, उस्मान पठाण, फकीर मोहम्मद मोमीन, जुबेर आतार, तौसीफ कुरेशी,रज्जाक काझी, मुनीर भाई कुरेशी, जावेद पटेल, सकलेन आतार, अश्फाक पटेल आदी मान्यवर व निमगाव, वडगाव कांदळी, पारगाव, येडगाव, खोडद, हिवरे तर्फे नारायणगाव, पिंपळगाव तर्फे नारायणगाव भागातील मशीद समितीचे अध्यक्ष व मुस्लिम बांधव उपस्थित होते. यावेळी शेलार यांनी केलेल्या आवाहनानाला प्रतिसाद देत ईद-ए-मिलाद निमित्त काढण्यात येणारी नियोजित मिरवणूक 5 सप्टेंबर 2025 ऐवजी 7 सप्टेंबर 2025 रोजी आयोजित करण्याचा निर्णय नारायणगाव पोलीस ठाण्याच्या अंतर्गत येणाऱ्या सर्व गावातील मुस्लिम बांधवांनी घेतला आहे अशी माहिती अश्फाक पटेल यांनी दिली. या निर्णयाचे सहाय्यक पोलिस निरीक्षक शेलार यांनी स्वागत केले.